KQZ: Pjesëmarrja 3-4% më e ulët se në 2015 – Shtyhet orari i votimi deri në orën 20:00
Komisioni Qendror i Zgjedhjeve zhvilloi një mbledhje më pak se një orë nga mbyllja e procesit të votimit. Pjesëmarrja në votime ishte tema kryesore e mbledhjes, ku ekspertët e KQZ vunë në dukje mangësitë e raportimit të këtij informacioni, përtej pjesëmarrjes së ulët.
Sipas ekspertëve të KQZ, pjesëmarrja sivjet deri në oraret e raportuara është 3-4% më e ulët se në zgjedhjet vendore të vitit 2015. Temperaturat e larta janë shkaku sipas tyre për mos vajtjen e qytetarëve në Qendrat e Votimit.
Për shkak të fluksit në rritje në QV, administrata propozoi shtyrjen e orarit zyrtar të votimit deri në orën 20:00.
Eksperti ligjor i Partisë Demokratike, Ivi Kaso, tha se përveç festës së Bajramit, nuk ka asnjë ndryshim nga zgjedhjet e kaluara, kur temperaturat e larta kanë shoqëruar gjithmonë procesin.
Partitë politike propozuan që votimi të vazhdojë vetëm në ato zona dhe Qendra Votimi ku ka ende votues dhe fluks. Ndërsa procedura zyrtare parashikonte se të gjithë të pranishmëve në Qendrat e Votimit në orën 19:00, duhet t’i mblidhet karta e identitetit dhe votimi të përfundojë derisa kur këta të fundit të kenë votuar.
Në fund të mbledhjes Komisioni vendosi të miratojë me 6 vota pro dhe 1 kundër propozimin e administratës për zgjatjen e orarit të votimit.
Zv/kryetari Denar Biba ndërkohë u bëri thirrje të gjithë qytetarëve të paraqiten pranë QV, ndërsa u kërkoi anëtarëve të komisioneve të jenë fleksibël në administrimin e këtyre rasteve.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.