Ministrja Ekonomi vizitë në një kompani në Shkozet. Lehtësim të procedurave doganore për bizneset

Ministrja e Zhvillimit Ekonomik, Turizmit, Tregtisë dhe Sipërmarrjes, Milva Ekonomi zhvilloi një vizitë në një kompani në Shkozet, e cila operon në fushën e prodhimit të konfesioneve të destinuara të gjitha për eksport në tregun italian.

Vizita e ministres në këtë sipërmarrje bëhet në vijim të vizitave të saj për të mbështetur biznesin, për të promovuar rastet model dhe për t’i inkurajuar këto sipërmarrje të ecin përpara.

Kompania në fjalë në vitin 2012 është financuar për një pjesë të investimeve të saj, nga Linja e Kredisë e Programit Italo-Shqiptar për zhvillimin e SME-ve në Shqipëri, me një vlerë 140,000 Euro nëpërmjet Bankës Credins.

Në këtë kompani, e cila prodhon uniforma kuzhine, veshmbathje dhe bluza, aktualisht punojnë rreth 200 punëtore, por së shpejti do të hapet dhe një mjedis i ri ku do të punësohen 120 punonjës të tjerë nga Durrësi, Shijaku dhe zonat përreth.

Ministrja vlerësoi ambientet shumë komode të punës dhe investimin e bërë nga kjo kompani, jo vetëm në makineri e teknologji, por dhe në mjediset përreth, ndërkohë që inkurajoi pronarët  për kontributin e tyre për produkte, që në eksport shkojnë me markën “Made in Albania”.

Gjithashtu, Ekonomi dëgjoi dhe problematikën me të cilat përballet ky biznes, ku ajo që u kërkua është lehtësimi i procedurave në dogana dhe njehsimi i këtyre procedurave në të gjitha doganat. Ministrja premtoi se këto situata janë adresuar, pasi pikërisht mbledhja e radhës e Këshillit të Investimeve ishte për këtë çështje, pra për lehtësimin edhe më tej të procedurave në dogana, si një kërkesë e ardhur nga biznesi.

Ndihma për këtë kompani është pjesë e programit të qeverisë italiane, nëpërmjet Agjencisë së Kooperacionit Italian për Zhvillim në Tiranë, në bashkëpunim me Ministrinë e Zhvillimit Ekonomik, Turizmit, Tregtisë dhe Sipërmarrjes, për të mbështetur realisht biznesin shqiptar. Rreth 25 milionë Euro është shifra që ka financuar deri tani programi për zhvillimin e Sektorit privat PRODAPS, në ndihmë të bizneseve të vogla dhe të mesme shqiptare, nga të cilat kanë përfituar 112 biznese dhe janë hapur 1550 vende pune.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.